【韓流】入圍大鐘獎爭男新人 朴敘俊暖男Look襲港辦見面會
大鐘獎朴敘俊
由韓國男星朴敘俊、姜河那主演嘅韓片《青年警察》上月喺香港上映,姜河那上月曾隨導演金周煥襲港宣傳,反而朴敘俊因其他工作未能一齊訪港。
不過朴敘俊憑韓劇《三流之路》而人氣急升,更趁機舉辦首個海外巡迴粉絲見面會吸金,見面會首站將於聽日喺香港九展舉行,朴敘俊今早一身米白色打扮暖男Look現身仁川國際機場,出發來港為見面會做準備。朴敘俊約於晏晝2點幾抵達香港,並喺保安包圍下步出接機大堂前往停車場,未知朴敘俊係咪喺飛機上補眠未瞓醒,現身時勁Cool,僅臨上車離開時先向粉絲揮手。
另外,「第54屆大鐘獎頒獎禮」將於下月25號舉行,大會今日公開入圍名單,朴敘俊憑《青年警察》有份角逐「最佳男新人」,而韓國今年首齣破千萬觀眾入場嘅《逆權司機》就入圍「最佳電影」、「最佳導演」、「最佳男演員」等11個獎項