艾華路莫拉達周三英聯盃做英雄，喺補時幫車路士絕殺般尼茅夫2:1入四強，但當時佢入完波慶祝，將個波塞落自己件波衫入面後啜手指，想慶祝太太上星期證實懷孕，點知換嚟一張黃牌，搞到累積夠數，周末作客愛華頓場英超要停賽。

莫拉達個嬌妻愛麗絲（Alice Campello）先前宣佈有喜，即將成為人父，呢位西班牙前鋒梗係興奮，所以想藉周三呢個絕殺入球慶祝吓，點知球證美臣咁唔畀面，衫都冇除都要罰佢黃牌，令莫拉達十分冇癮。不過，靚妻就撐老公，喺ig上載莫拉達慶祝張相，表示已經收到老公心意，成個人都被「融化了」。

拖肥最近喺艾拿迪斯執掌後復甦，相信冇咗莫拉達嘅車仔周六造訪葛迪遜公園，三分一定難啃。不過，講番轉頭，莫拉達家陣就多咗個聖誕假放，可以陪下老婆，到拆禮物日對白禮頓先再重披車仔戰衣。

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM