有份主演近期熱播劇《W》嘅男星李鍾碩，去年因同女星朴信惠合作《愛上Pinocchio》而傳出緋聞，不過兩人就例牌否認。雖然兩人曾傳出緋聞，但佢哋都冇避嫌，李鍾碩更大方送咖啡車去《Doctors》嘅片場，為好友應援，令外界再度關注起兩人嘅緋聞。

噚日咖啡車嘅負責人喺Instagram上載咗李鍾碩送嘅咖啡車，只見李鍾碩唔止送畀朴信惠，連帶男女配角李聖經、尹均相都有份，據知因為李鍾碩亦曾經同尹均相合作，同時因簽約YG事務所同李聖經變成同門，所以就一次過送晒畀三個人。而李鍾碩更喺橫額搞鬼地寫住：「辛苦喇，幾時到我呢？」似乎佢都想喺《W》拍攝現場收到好友嘅咖啡車應援，唔知朴信惠3人遲啲又會唔會準備呢？

而李聖經同尹均相喺收到咖啡車之後，都有上載認證照到Ig話好多謝李鍾碩，唯獨朴信惠喺Ig上載咗自己嘅新相，叫粉絲今晚記得準時收睇《Doctors》。