貿易Ｒ今年暑假退休，賦閒在家，睇報紙睇得好詳細，佢睇到十二月二十三日陶傑喺「黃金冒險號」專欄寫哲學系，睇到哈哈大笑，因為佢係過來人，曾經讀過哲學系，讀哲學，素來係大冷門，若非當年中大哲學系有唐君毅、牟宗三、勞思光呢啲大師級人馬在，想搵人讀都好艱難。貿易Ｒ考大學入學試成績唔算標青，為咗穩陣計，報讀哲學系，讀完一年班就轉系。貿易Ｒ話：「打從李天命時期計起，哲學系以學生人數少著名，搵夠人組織一隊籃球隊都唔容易。啲家長都唔知哲學系係乜東東，最唔贊成仔女讀呢科。」

諗吓又係，讀完哲學，有乜工做呢？貿易Ｒ話：「我做咗商界貿易十零年之後，先知道自己想法膚淺，大學主修邊科，與做事無大關係，最緊要係思想清晰，有分析能力，能夠綜合歸納，化繁為簡。其實讀哲學幾刺激思想、思考㗎。不過講得咁抽象，媽咪會聽唔明。」
貿易Ｒ問左丁山識唔識得一啲讀哲學而不在大學教哲學嘅人，諗咗一輪，有噃，即刻答：「最出名嗰位就係我識佢，佢唔識我嘅李小龍，佢喺西雅圖華盛頓大學讀哲學系，重有一位，就係我做銀行時我哋銀行嘅首席債券策略師，係美國人。呀，重有一位，做過MorganGrenfell（摩根建富）嘅基金經理，曾與基金名人謝清海做同事。專欄作家岑逸飛呢，劉天賜呢……」
貿易Ｒ話：「你都算有啲常識，最近挪威國家石油基金就請咗一位哲學教授負責決定某啲公司是否適合挪威投資，決定嘅準則係商業倫理（businessethics）以及社會倫理（socialethics），呢位教授話自己平時同古希臘人講心多過與當代挪威同胞對話，不過國家需要佢，佢亦願意試吓參與基金管理。」挪威嘅層次真係高，與一般只係追求利潤不顧其餘嘅國家不同。貿易Ｒ話：「𠵱家都有叻仔讀哲學㗎，我知道今年中大新亞書院頒『誠明獎』給予最優秀畢業生，一位哲學系男仔攞咗，打破歷來紀錄！」