在she.com網男狂數港女81宗罪風波愈鬧愈大，一個針對港女禍港的「港女災難應變中心」網站近日成立，開宗明義是針對及批評港女人格、行為而設，目的是「提升港女心理質素水平」，所謂知己知彼，網站載錄了名為港女反擊「港男極醜惡真面目」的鴻文，列出港男81項缺點，可說蔚為奇觀。

港女眼中的港男缺點可概括為孤寒、好色、醜樣、不成熟、多壞習慣等數大類別，如出街畀錢時扮冇帶或者唔見銀包；每逢畀錢就借尿遁；話接你食嘢，根本要你找數；唔畀家用；銀包有十張卡，但張張都碌爆晒；見到名牌店即刻兜路走。好色則因鍾意叫雞、成日睇日本AV（成人電影）、當女友是AV女郎、拍拖有sex當「老逢」、鍾意影人裙底、首次約會即猴擒濕吻。港男外形也是致命傷，港女批評港男多數衣着冇品味、煙屎牙、大肚腩加地中海，「影衰」港女。

大唔透的港男被港女視為不成熟，最大罪的是底褲仲係阿媽買。另外缺點包括做嘢唔經大腦，其實係冇腦；揀女仔淨係識睇樣同身材；膚淺；言之無物；正一垃圾口；放飛機唔使本；冇責任感；愛送安全套做生日禮物。港男壞習慣更是罄竹難書，去完廁所唔洗手，臭過地底泥；唱k走晒音，夾硬賴支咪壞；打女人；學歷低；唔長進；成日癩蝦蟆想食天鵝肉；專打拼音，英文差又唔識打中文；自己女朋友叫靚女，人哋女朋友叫港女，唔記得自己阿媽都係香港女人。