書展曲終人散，唔少愛（買）書人滿載而歸，好多人都等到書展最後一日先入場，希望執平貨，不過作者見到自己作品賤價而沽，可能幾傷感。
中大政治與行政學系助理教授馬嶽年前喺《茶杯雜誌》寫波經，不過題材唔係大路波盤分析，而係透過經濟、政治睇足球，內容學術味道濃厚，可以話係別樹一格，亦可以視為偏鋒，後來《茶杯》將呢批文章結集成書，出版《教授足球：以治學態度睇波》，八方聽聞書展期間，出版社大劈價賣書，馬嶽呢本嘔心瀝血著作只賣兩蚊雞！

馬嶽話知道出版社大平賣佢作品，不過佢話本書內容屬小眾口味，估計出版至今銷量僅二、三百本，「我只係想留個紀錄，賣幾多本、幾多錢冇所謂。」佢又話𠵱家冇再寫同類型足球評論，一來冇時間，二來冇適合地盤。
《茶杯》為求清貨，連煲呔心戰室主將劉細良本《卡拉OK政治論》都兩蚊大平賣，另一作者袁震揮《響朵》都係兩蚊有交易，有人話當日「兩蚊兩蚊兩蚊呀」叫賣聲犀利，媲美絲襪佬散貨場。