周日（9日）是香港一年一度的國際賽日，亦係愛爾蘭騎師莫艾誠四日客串期嘅最後一日。

記得2016至17年度馬季季中，莫艾誠初次嚟香港客串約三個月，當時佢仲係等待上位既小伙子，士別三日，刮目相看。今年莫艾誠已躋身成為一線騎師，喺歐洲頻頻贏大賽，更被英國馬經傳媒選為年度最佳平地賽騎師。

今次莫艾誠短暫留港大約兩個星期，冇時間好似上次留港三個月嗰陣，去廟街丶獅子山丶龍脊等唔同景點周圍逛，大部份時間都留喺鬧市入面，同朋友聚舊。

成為咗一線騎師後，莫艾誠策騎機會多咗，所以唔肯定將來會唔會在港客串一段較長時間，而今次暫時有個遺憾，就係未能交出頭馬，暫時12戰只憑「萬霸駒」殺入一席亞軍。

周日四匹座騎之中，以第四場2400米香港瓶之「怒江」級數最高，曾喺加冕錦標領放幾乎帶到，壓線前僅被「金庫神偷」追過，嗰場騎「怒江」既蘇兆輝今場騎「鷹雄」，前駒落入莫艾誠手中。

長途賽多數缺乏步速，「怒江」會否重施故技慢放，非常考驗鞍上人之判斷力，呢場將會睇到莫艾誠的功架，如果贏埋兼開齋，必會成經典。