當年今日
關於我們

【李八方online】世盃燈神民記搞錯英格蘭旗 做乜唔撐中國隊嘅?

蘋果日報 2018/06/21 12:54

李八方ONLINE民建聯比利時英格蘭世界盃燈神

四年一度嘅世界盃開打一星期,32支隊球隊全部亮過相,阿根廷被冰島逼和、衞冕冠軍嘅德國隊輸畀墨西哥、巴西打和瑞士,令唔少球迷跌眼鏡,fans周圍搵下邊個係「明燈」,即係捧邊隊就陀衰邊隊,發現其中一盞「明燈」就係民建聯喇!佢哋連續兩日喺facebook出post話撐阿根廷、德國,結果中晒……對家,佢哋日前再出招,今次唔敢講到明撐邊隊,但重點講G組英格蘭同比利時,議員各有心水,「究竟依兩隊可唔可以一齊雙雙出線呢?」
但八方發現,個post張圖就出咗事,出咗支紅十字偏左嘅英格蘭旗,成件事錯哂。公民黨楊岳橋嘅「810扮工室」fb專頁亦出post寸「連人哋支旗都搞錯仲話撐」,解釋埋英格蘭旗上的紅十字「Saint George's Cross」應該喺正中央。有網民留言話民建聯侮辱人哋國旗,又質疑係咪特登架。
其實民建聯自己都直認係「明燈」,喺fb寫明「燈神忠告:燈神唔怕做,最緊要唔賭」,根據張圖擺位,周浩鼎、劉國勳、張國鈞就企英格蘭嗰邊,何俊賢就企比利時嗰邊。而家兩隊首仗都旗開得勝,28號就會碰頭,咁樣玩法,搵一啲議員撐一隊,另一啲就撐對手,就唔使畀人話「明燈」喇,真係好無敵呀!
八方今朝問過阿鼎,佢一見到個post都非常驚訝,直言「有少少認識都知係錯咗」,會即時通知同事更正,佢更加主動認錯:「係我冇睇清楚深感抱歉」。講到世界盃,佢話撐硬英格蘭,事關自己本身喺英國讀書,情有獨鍾喎。
有網民就喺民建聯fb留言反問「是不是忘記當年八國聯軍入侵之恥」、「又話自己係中國人,做乜支持敵國球隊,唔支持中國足球隊」,咁佢哋都唔想嘅,中國入唔到決賽周,點撐啫。