【新增影片】

法國球皇施丹踢波教波同樣掂，但佢啲仔就似乎冇老豆咁勁，22歲大仔安素都叫做似樣啲，不過依家都係只係踢緊西甲榜尾嘅艾拉維斯。安素細佬盧卡就似乎仲唔掂，佢周日喺西丙聯賽為皇馬B隊作客納瓦爾卡爾內羅（Navalcarnero），期間犯下致命錯誤，連累球隊以1:2落敗。

踢到下半場13分鐘，皇馬B隊當時領先1:0，踢龍門嘅盧卡當時接應隊友回傳，但之後就控住個波猶疑不決，想大腳清嗰時又省中前來壓迫嘅敵方球員，情急之下只好將對方拉跌，成個過程都好狼狽！最終盧卡連累球隊輸12碼，而納瓦爾卡爾內羅的球員亦成功射入，追成比數1:1。納瓦爾卡爾內羅之後再入多球，最終以2:1戰勝皇馬B隊。

查實盧卡做龍嘅表現一向都麻麻，佢上年代表皇馬出戰青年歐聯，喺一場對住巴黎聖日耳門嘅比賽，面對對手起腳勁射竟然「驚波」避開，任由皮球入網。盧卡踢龍踢到咁狼狽，會唔會學似老豆咁，轉打中場話唔定有轉機！