由韓國神劇《太陽的後裔》金牌編劇金恩淑執筆、李秉憲及金泰璃主演嘅tvN劇集《陽光先生》(Mr. Sunshine)，前晚播出嘅第17集受雅加達亞運男足決賽影響，搞到收視急跌到7.694%，不過噚晚播出嘅第18集收視就升返，有14.722%收視率，港劇迷可於周六、日晚10時30分透過Netflix追劇。

《陽光先生》仲有6集就大結局，劇情都慢慢進入高潮，李秉憲答應朝鮮皇帝嘅委託，入宮擔任軍事學校嘅外國教練，但就多次與金義聖飾演嘅親日派大臣有衝突。而卞耀漢忍痛與金泰璃解除婚約後，專心創立自己嘅新聞報社，報道內容更大膽提到日軍入侵朝鮮，唔知會唔會令佢生命受到威脅？至於柳演錫亦受到槍手襲擊，性命垂危，金玟廷亦於自己嘅酒店內受到跋扈嘅日軍調戲，暗示朝鮮嘅內憂外患。

另外，《陽光先生》噚日舉行煞科宴，金泰璃、金玟廷及編劇金恩淑都有出席，不過李秉憲就因為受品牌邀請，正身處威尼斯，無法出席煞科宴。而李秉憲就與英國男神班尼狄甘巴貝治（Benedict Cumberbatch）齊齊出席於品牌當地舉行嘅第75屆威尼斯影展晚宴，班尼狄更於宴會上表演「Letters Live」，朗讀歷史信函。

精選韓流，喺晒《娛果》
http://fb.com/appledailyent