2016年立法會選舉「票王」、人稱「鄺神」的民主黨議員鄺俊宇，昨日（11月30日）遷出過去4年使用的立法會議員辦公室前接受《蘋果》訪問。他坦言辭職後一度因擔心香港前景和議辦員工去向而失落，但失落過後，會繼續與香港人前行，未來除以區議員身份為民發聲，亦會透過其YouTube頻道監察政府施政，並於本月出版一本有關香港的小說。失去議席，他處之泰然：「喺議會以外，只要你唔放棄，你一樣可以同巿民互動；無咗議席，但我身邊有香港人，所以我唔擔心」。

記者 林俊謙

鄺俊宇昨在滿佈紙皮箱和紅白藍膠袋的立法會議辦接受訪問時形容，個人最大遺憾是暫時不能再在議事堂直接與高官周旋：「你問我有無失落過？係有嘅，不過個失落位並非諗自己，而係諗香港，諗香港下一步點行。」

對於建制派經常指控他因要供樓而戀棧議員職位，鄺俊宇對抹黑一笑置之，並指自己十分感恩，2016年起賣書成績已相當不錯，當年已透過作家收入解決高額選舉開支，「（收入）呢個一直都唔係我擔心嘅問題」。

2016年以近50萬票成為超級區議會「票王」，近年更在民調成為十大議員之首，鄺俊宇未因失去議席而失去希望，更自覺有責任「諗橋」與香港人繼續前行。他近日全力發展YouTube頻道評論時政，希望抵抗建制派網上的歪理，並感激近日片段上載一日即獲逾10萬點擊人次，「喺議會以外，只要你唔放棄，你一樣可以同你嘅巿民、你嘅人互動，無咗議席，但我身邊有香港人，所以我唔擔心」，並笑指：「林鄭身邊就無香港人嘞！」

失去議員身份前一日，鄺仍透過議員身份到監獄探望「反送中」運動被捕的手足，他表明日後仍會繼續爭取進行同類探訪，「我好簡單，只係想幫多啲人，我想眾人平安，呢個一向係我嘅原則……只有平安，我哋先能留有用之軀，做世界冠軍」。

面對政府政治打壓連連，他坦言目前只能見步行步，未決定將來會否再參選立法會，「但我對未來係有信心嘅，因為香港人係會令你覺得有信心，我哋要積極啲，打好未來嘅仗」。雖然未知會否再戰立會，但他明言沒有打算移民，並希望留港落地生根，「我唔會走，（香港）邊度唔好，我哋就留低做返好佢，呢個係我一直嘅諗法，因為我喺度大㗎嘛，所以我覺得應該要繼續努力」。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！