納稅人畀錢,公務員讓權,同一個由尤德、李後、魯平年代就開始玩泥沙二十年嘅「民主建港」政黨培養政治人才?都咪話唔風趣。或者知道講大咗,嗱嗱聲縮,話該黨青年團只係得兩三個人,有資格做「政務助理」而已!
冇錯,今日全香港只得曾蔭權爵士一個係公僕王兼領正牌嘅資深專業政治家,可見物以罕為貴,但唔等於人哋有義務用納稅人啲錢同你開班授徒!爵士在競選時,應承「研究」,競選完畢,咁啱線,研究亦有結果,就係所謂政務助理,唔係菲傭嘅「家務助理」(DomesticAssistant),要有資歷、有經驗,同埋絕對唔可以做二五仔!
咁即是話,就算開咗呢層位,對唔住,都唔會畀民建聯!係人都知,民建聯有祖國做靠山,有好多線直通天庭,政務助理上昅爵士肥龍,中窺司局長官,下則監控成班AO,同時向兩個「黨中央」(一個大嘅喺北京,另一個細嘅喺北角)做二五,一時話肥龍太鍾意意大利歌劇,唔夠愛國愛港,一陣又屈何志平飯局太多,呢個政府不如雙手奉送埋畀民建聯包辦,咁係咪違反埋基本法?
唔只民建聯,任命得老左,又點可以唔派番幾個位畀民主派,民主派一樣要培養青年黨員,攝個張韻琪或者陶君行入去,佢條二五線,搭一條去李柱銘度唔緊要,分分鐘又分叉多一條,搭去美國領事館,咁煲呔肥龍咪大鑊?