無綫近年不斷流失猛將，好戲之人黃德斌上月離開合作咗20年嘅無綫，決定向外闖，呼吸自由空氣。黃德斌日前喺尖沙嘴接受專訪時話：「好舒服，係想要嗰種自由，嗰啖空氣係想咗好耐，𠵱家有好多嘢傾緊，有啲係意想不到。」黃德斌話呢個決定冇話遲定早：「隨心，想出去咪出去。出面世界好大，電視城係小世界，我趁住呢個機會出去開眼界。」黃德斌話嚟緊會喺上海做舞台劇，明年可能有機會去澳洲、加拿大演出，𠵱家仲傾緊。

未有代表作

過去拍過逾50部劇集，但黃德斌覺得未有代表作：「不過好多套都入心入肺，好多角色都深入民心，好似《真情》到𠵱家啲人都以為我係越南人，《金枝慾孽》、《火舞黃沙》、《珠光寶氣》同《天與地》，套套都有唔同感覺，係咪主角對我嚟講已經唔係咁重要。」
無綫近年缺小生花旦，雖力捧新人，卻欠前輩扶助，新人被彈演技唔掂，黃德斌話：「與其話人新，不如話自己太舊，必然嘅事，邊個一出嚟就會係影帝影后？點都要畀啲機會佢哋，以前好處係幕後比較強，知道點用人，為演員度身訂做，𠵱家係演員去就角色，未揣摩到，又要試下一個挑戰。」
場地提供：The AIR（The ONE）
撰文：馮仁昭