外號元秋嘅民建聯立法會議員蔣麗芸早排叫人蒸口罩翻用，結果畀網民恥笑佢冇常識之餘，連衞生防護中心已經出po反擊話唔work，但元秋就明顯唔肯承認自己有錯，噚日再係fb出po為自己大平反，除咗引述台灣中山醫學大學生物醫學科學系教授賴全裕嘅研究結果，甚至委託香港標準及檢定中心檢測，話報告證明高溫蒸口罩10分鐘後，唔單止無破壞口罩結構，口罩平均過濾能力只係下跌0.11%，力證高溫消毒係可行。

網民：蒸蒸個腦先

元秋今次學精咗，好似拎好多證據為自己平反，但網民又再恥笑佢，叫元秋不如自己蒸蒸個腦先，話好多長者會相信，希望元秋畀返少少責任感，亦有網民話，即使過濾力只有少少損害，但口罩內層仲有阻隔病毒、細菌功能，呢啲功能有冇損害？仲符唔符合VEF 、PEF等認證要求？元秋就冇交代！

而衞生防護中心亦再出po反擊，今次仲製圖話畀大家聽「外科口罩消毒完可重用？絕對唔係！」強調所有外科口罩都係即棄式，用過嘅口罩表面已經沾染病菌，濕咗嘅口罩會影響效用。八方覺得最亮眼嘅反而係Hashtag，「老是常出現」、「舊po再出」，而「建議考慮少啲講啲冇乜用嘅說話」，更係直線抽擊KO元秋。

李八方