江若琳今日喺商台宣傳新歌《思念的宵夜》同之後舉行嘅音樂會，佢今次搵咗杜汶澤做導演拍MV兼做埋男主角，之前因為杜汶澤敢言，好多人怕同佢扯上關係，而唔同佢合作，江若琳話：「黐線，我哋係兄弟嘛！以前我同佢拍過電影《高舉愛》，好多人都鍾意，戲中阿澤死嘅，呢個MV當係套戲延續。」佢讚阿澤好認真，第一時間已答應，仲自己去睇景又開會，拍出來效果好詩情畫意，讚對方私下為人浪漫。

o依家積極籌備演唱會，江若琳話戒食消夜，連男友蕭潤邦嘅招牌生煎包都唔多食。之前啤梨求婚大陣仗，江若琳話：「佢（男友）叫我唔好睇咁多，話會教壞人，朋友分享求婚經歷，佢都叫我唔好聽。」江若琳又話自己唔使要求好多，而男友不懂浪漫，會自爆驚喜。