由16個業內團體組成嘅香港版權大聯盟今日「晒冷」,喺中環一大廈舉行記者會,推銷《2014年版權(修訂)條例草案》,出席代表包括香港國際影視協會常務董事何偉雄、國際唱片業協會(香港會)總裁馮添枝,就連香港動漫聯會會長黃玉郎及漫畫家劉雲傑亦有到場。
作為香港漫畫界舊日龍頭嘅黃玉郎及劉雲傑,因為撐呢條條例,卻引嚟網民翻舊賬,指佢哋過往唔少作品好多封面同內頁分鏡均有抄襲成分,受害人包括日本漫畫家池上遼一,泰國電影《冬陰功》,由高修主演嘅04年韓國電影《Some》以及畢彼特一張普通硬照。
其實有部份港漫畫家一向被網民痛罵為「複製人」,經常連分鏡都抄考美日漫畫,如果黃玉郎嘅「降龍十八腿」要問少林寺攞版權,咁呢堆相係咪要問韓國美國同泰國電影方面攞版權呢?
另外,如果版權條例真係嚴格成咁,唔好以為唔關師奶事,師奶最愛去圖書館借閱嘅「尋夢園系列」小說,封面就成日同明星相「撞口撞面」!