中貿林不久前做咗中學校董，中文叫校董，名詞幾悅耳，英文名字就俗啲咯，叫做SchoolManager（學校經理）。當上學校經理，就有資格做教育功能團體選民，中貿林接到選民通知之後，睇見投票區在新界，為之愕然，問公關K：「點解我要去新界投票，我住響香港東區噃？」公關K聽得糊塗，講咗一輪先知道政府冇搞錯。公關K話：「恭喜你，你有兩張選票，你係東區選民，但你間學校喺新界西，可能因此要去嗰邊投功能團體票。」
中貿林何止有兩票，如果佢間公司係香港總商會會員，登記咗做選民，佢會有三票㖭。但係好多公司唔記得登記，據聽聞，呢類商會功能團體嘅登記選民，為數甚少，最多每個得千零二千，假設投票率係五成，參選者獲得三四百票，已經得咗。功能團體係小圈子選舉，拉票比較容易，選出嚟嘅代表，是否人才，是否具備代表性，大家有眼睇。

功能團體選舉分公司投票（如總商會）與私人投票（如工程師、會計師）兩類，前者更易圍威畏，後者就惡搞啲咯。例如何鍾泰博士代表嘅工程界，失業率嚴重，消息人士話幾間大顧問公司如M記、SW記，每個星期都炒人，已經係炒咗好幾千人。工程人員失業，梗會責罵佢哋嘅立法會議員冇代佢哋爭取政府工程上馬，何鍾泰唔知會唔會競選連任，如果會嘅話，佢點樣安撫選民呢？
上星期經過駿景園，見到火炭落路下與駿景園往大埔公路通道嘅接駁工程快將完工，因為有個牌寫住：完工日期，八月三十一日。惡佬明話且慢高興，到咗八月，個牌分分鐘會改為：十二月三十一日。呢啲招數，佢見過好多次，工程界人人都知。至於為何如此，佢唔肯講。