兩個月前誕下千金嘅乒壇可愛教主福原愛，最近上日本電視台一個清談節目時，透露自己對住囡囡講嘢時，會日文同普通話雙語並用。

雖然阿囡咁細個，乜都未聽明，但福原愛希望等佢細細個就聽到呢兩種語言，大個要教都易啲：「我會先用普通話同佢講，然後再用日文將相同意思嘅句子講多次。佢身上流住兩種血，但如果血統入面日本佔得多啲，咁我諗佢日文會勁啲，哈哈......」福原愛仲話，有時當阿囡喊緊，佢同老公江宏杰都唔知用日文定普通話氹佢好。

被問到生完女後仲會唔會揸番乒乓波拍打波，福原愛就唔敢講到好實：「里約奧運後，我只係揸過拍一次，如果想挑戰東京奧運，肯定會好艱辛，所以到底復唔復出，我仲煩惱緊。」

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM