女子組合Freeze嘅21歲成員石詠莉（Sukie）同圈外男友分手後，感情一直冇着落，但日前佢同23歲嘅李彩華（Rain）胞弟、俾人封為老翻林峯嘅李健中（Ray）相約去淺水灣鴛鴦戲水，感情定非泛泛。Sukie當日身穿比堅尼top加熱褲，34E逼爆上圍惹嚟唔少男泳客狂昅。
Sukie同Ray當日下晝三點幾已到沙灘，女方身穿露背沙灘裙，抱住一隻狗仔，而男方就赤裸上身、着板仔褲，齊齊踩水嬉戲，其間Sukie將狗仔拋落水，當值救生員見狀即刻制止，事關呢個泳灘唔畀人帶寵物落水，之後佢哋抱番隻狗，改去小食部搵食。

拖狗落水遭警告

Sukie早排整傷右膝，所以行沙灘時步步為營，仲搭住Ray隻手以防跌親。其後佢哋返原位，Sukie除咗條裙露出比堅尼top同熱褲，身材充滿爆炸感，搞到Ray都唔好意思望住佢，反而Sukie表現從容，瞓喺沙灘蓆上日光浴之餘，仲幫Ray搽太陽油，跟住兩人一狗又落水，玩得非常開心。不過救生員見Sukie又拖狗落水就即時發出廣播，提醒泳客唔可以帶狗落水，搞到佢哋面懵懵，即刻將隻狗交畀同行嘅女伴照顧。
至於Sukie同Ray嘅認識，相信係因為Sukie所屬嘅美容公司老闆，就係Rain嘅前緋聞男友蕭定一，所以Sukie同Rain嘅細佬相熟，而且Ray都做過嗰間美容公司旗下減肥代言人，換言之Ray同Sukie閉門一家親，不過佢哋就異口同聲話大家只係朋友，未到拍拖階段喎！