近期積極掃貨嘅資深投資者,勵致國際前主席黎汝遠,又再出手,斥資一千二百七十六萬,購入金鐘力寶中心二座低層,二千二呎寫字樓,每呎五千八。
據了解,佢計劃將上址摸出,速度認真夠快,叫價就未有透露。
黎汝遠除咗鍾情金鐘遠東金融中心外,連乙級商廈都掃,估計已購入嘅寫字樓,總值近二億。不過,唔少好快已經賣咗,而且重賺大錢。
好似上嗰禮拜,先以八千一萬摸出,金鐘遠東金融中心四十六樓全層,短短一周,賺咗近九百萬。今次再入市,唔知道係咪「食過翻尋味」?
講番佢早前賣咗嗰層遠金寫字樓,月初以逾七千二萬買入,全層逾萬呎,一半交吉,新買家𠵱家以每呎二十五蚊招租。邊嗰係新業主?有市場消息指出,係永傑集團或有關人士。
女將回朝即建功
市道好咗,唔少喺淡市退出地產代理行頭嘅前線員工,近排開始陸續入番行。
據聞,有個以前喺中原大埔康樂園嘅女經紀,舊年敵不過淡市,短暫退出,去咗推銷香薰。
佢見近排個市旺番,今個月重回中記,駐守紅磡黃埔花園分行。
佢上司話,呢位女經紀非常勤力,不斷更新買家資料。直至最近,幫一名黃埔業主,喺一個禮拜內,連氣買咗兩間赤柱富豪海灣獨立屋。夾埋成八千九萬,幫分行進帳唔少之餘,自己收入亦相當可觀。
GrosvenorPlace威
蘭西上個禮拜講過,淺水灣道117號GrosvenorPlace獲提名「第十五屆國際房地產交易會」,喺住宅類別中,跟嚟自荷蘭及德國嘅住宅,爭奪「全球最佳住宅物業」獎。結果勝出,攞到等同建築界「奧斯卡」地位嘅獎項,梗係威啦!
發展商GrosvenorAsia董事總經理陸智德,同埋建築師PaulDavis,明日與香港傳媒嚟個視像會議,講吓得獎心得,對本港房地產市場有乜意義。當然重有就係發展商最關心嘅,對樓盤銷售影響啦!唔知有冇諗住乘勝追擊,趁勢提早開盤呢?
賣得快唔高興
住宅價錢長升長有,發展商唔使諗好多橋,都可以賣到樓,睇落好似比以前輕鬆易做好多,但事實原來又唔係咁喎!
由於樓價不斷上升,吸引好多投資者與炒家,買入一手單位,三兩吓就轉手賺錢。蘭西聽聞,有啲發展商最高層,睇見呢啲報道,覺得自己樓盤賣平咗,先至畀炒家有機可乘,所以唔多高興。咁下面售樓部同事,好自然有壓力啦。
發展商近排放慢手腳賣樓就係咁解,因為賣完就畀炒家賺一轉,樓盤出現太多炒賣,容乜易搞到自己連份工都冇埋。有啲售樓部職員就採用每日賣少少嘅策略,額滿後重有客想買,就會暗示佢「明天請早」。
蘭西覺得,除非樓價唔升,或者發展商封盤唔賣,否則根本阻唔到炒家。