林建岳女兒林心兒、許懷欣（Ryan）夫婦、陳柏熹同周美欣等，噚晚喺尖沙嘴出席LV酒會，心兒着上短皮褲大騷長腿，大搶風頭。

心兒謂農曆新年心兒將會舉家到拉斯維加斯旅行，仲爆咗個喜訊：「會同爹哋嫲嫲去，因為嫲嫲好鍾意呢個地方。家姐（恬兒）要坐月唔去得，佢好注重身體，我第二次做阿姨喇！」原來前年誕下B仔後、恬兒已榮升第二任媽媽，恭喜晒恭喜晒！

講到BB女，心兒大讚好靚女，同家姐、姐夫何正德都似樣。咁送咗咩禮物畀BB？心兒話：「我喺LA買咗，每次見到得意嘅BB嘢都會買定。」心兒仲大讚姨甥仔女兩個都好乖。咁依家屋企係咪好熱鬧？心兒話：「我哋屋企一向都好熱鬧。」

咁幾時輪到心兒結婚生BB呢？心兒就話自己仲未拍拖，又笑謂媽咪好開放、畀好多自由佢。咁做佢男朋友要咩條件先？心兒話：「開心就得。」

另外，同場嘅Ryan就話嚟緊會同歌神爸爸許冠傑去外地開騷，所以都好忙，依家Ryan有一對五歲孖仔，細佬懷谷嘅囝囝就嚟100日，屋企好熱鬧，爺爺湊孫都湊得好開心。

Ryan話：「每個禮拜我哋都會返媽咪度食飯，好熱鬧，兩個仔會唱歌畀細佬聽，佢哋仲會問我哋幾時再生。」因為一屋都係孫仔，就連Ryan媽咪都催佢哋追番個女，不過Ryan就話一對孖仔都好辛苦，等佢忙完先再考慮。