現年29歲嘅07年國際中華小姐季軍陳爽，今日喺海南島三亞，同拍拖年多、32歲嘅金融才俊梁梓軒（Anthony）拉埋天窗。嫁得金龜嘅陳爽更包機票食宿，豪請李亞男、朱璇等多位華姐做星級姊妹團。一對新人婚後會同親友留喺三亞度假，休息幾日先返港。明年1月20日再喺香港補擺喜酒。

有份到三亞觀禮嘅李亞男，今日喺微博貼相同fans分享喜悅，仲留言恭賀新婚嘅好姊妹陳爽︰「阿爽，真的太高興、感動，你找到了幸福！也多謝請我來三亞。」相中只見陳爽同老公夕陽下於海灘相擁對望，非常溫馨，李亞男則邊食麵邊留影，又與新娘同朱璇著上清涼沙灘短裙喺海邊餐廳晒長腿，真係寧舍心曠神怡。