當年今日

馮仁昭四圍超:
華仔多倫多個唱半滿虛驚一場

蘋果日報 2002/03/28 00:00


劉德華(華仔)喺北美展開嘅巡迴演唱會,首站喺加拿大多倫多舉行,但演唱會卻喺漫天風雪中進行。
華仔前晚喺多倫多華瑪賭場演奏廳舉行演唱會,原本喺晚上八點開始,但因風雪影響延遲咗近二十分鐘,而全場原本爆滿嘅五千幾個座位,只係疏疏落落咁坐咗五成觀眾,華仔出場時都嚇咗一跳,佢重話:「咁嘅場面,返到香港邊度都唔使去。」

觀眾陸續入場
幸好華仔唱完第二部分後,因受天氣同交通影響而遲到嘅觀眾亦陸續到場,令華仔鬆一口氣,佢好風騷咁話:「咁先似樣。」
華仔除咗唱出多首歌曲如《笨小孩》、《一起走過的日子》同《中國人》外,更同黃蕊大跳拉丁舞,令觀眾睇到如癡如醉。 特約記者馮慧貞多倫多直擊

施念慈出書獲老公體諒
施念慈嫁咗畀年輕又有家底嘅老公陳鴻業之後,本來可以乜都唔使做,安安樂樂咁做少奶奶,享其清福。
不過施念慈同馮仁昭講,如果唔做嘢會同社會脫節,所以佢除咗喺新城主持節目《投姿有意思》之外,重成日喺屋企埋頭苦幹寫書。
陳鴻業重好體諒老婆仔,唔單止冇阻止佢發展事業,重專登買燕窩畀佢補身,咁嘅老公真係唔話得。
雷宇揚冇銀碼支票救友
雷宇揚(阿雷)近年由幕前跳到幕後搵真銀,而且主持電台節目,又出埋鬼古書。最近佢本新作《枕邊凶靈》小說已經推出咗,阿雷又可以撈一筆,可謂豬籠入水。
其實阿雷份人真係幾有義氣,早排佢有個朋友有事,要借錢周轉,阿雷即刻二話不說,開咗張冇填銀碼嘅支票畀老友應急。可以做到佢朋友,認真幸運。

李克勤同環球高層不和
李克勤早前因為演唱會原聲大碟賣到缺貨,搞到有歌迷向克勤投訴買唔到碟。
克勤重同環球高層陳少寶起爭執,事緣陳少寶日前俾記者問起克勤同公司嘅關係,佢竟然話克勤已經走咗,啲記者以為克勤離開咗環球。環球高層CalvinWong噚日解釋,陳少寶嘅意思係話克勤離開咗香港,同媽咪去澳洲旅行,而佢隻碟亦已經出番貨,𠵱家銷情都唔錯。