前新聞主播魏綺珊今日喺北角出席「香港服務大獎2018頒獎禮」，並獲頒「慈善之星」大獎，佢話喺16年8月曾跟國際培幼會前往柬埔寨探訪，此行令佢留下深刻印象，希望今年有機會再去探訪。

熱愛戲劇嘅魏綺珊，早前完成有關當舖嘅舞台劇，之後陸續有新搞作，佢話：「7月會同兩位日本藝人合作多媒體形體騷，表達水嘅生命力，呢個靈感係嚟自『水知道答案』呢本書，日本有位博士花咗好多時間去研究水喺結晶時嘅狀況，發覺水係有感覺，人身有百分之七十都係水，所以水對生命嘅影響係好大，我覺得呢個題材幾得意，同埋已經籌備咗一年；我哋嘅無障礙劇團喺9月又有大型製作。」

至於年底，魏綺珊將出演一個改編真人真事嘅舞台劇，佢表示：「日本橫濱有個女子叫西岡雪子，戰時佢喺日本做慰安婦，傳奇一生，佢為日本做咗好多嘢，但最後被身邊好多人唔明白而唾棄咗佢，覺得佢好低賤，佢知道自己一生做緊乜嘢，好努力為自己搵番應有嘅尊嚴，中間有段可歌可泣嘅愛情故事。」

精選娛聞，喺晒《娛果》
http://fb.com/appledailyent