當年今日

體壇拾趣:花招襲濠江
哈林等你入隊

蘋果日報 2013/07/13 00:00


提起美國籃球,自然諗起NBA,其實仲有一支聞名於世嘅哈林花式籃球隊(Harlem Globetrotters),今晚佢哋首次喺澳門金光綜藝館開騷;教練Blacklock噚日接受本報訪問時話,哈林無分國界,香港人都有機會成為球隊一分子。
訪北韓見過金正恩
哈林籃球隊各人身懷絕技,喺球場上玩棟篤笑、扮鬼扮馬都冇難度,最勁就係大玩花式入樽,喺YouTube有成千上萬嘅精華片段,令唔少人羨慕,甚至夢想加入球隊。自2011年開始擔任主教練嘅Blacklock,曾經喺1974至87年以球員身份,喺62個國家表演;佢𠵱家其中一項工作就係挑選新血,「每年我哋都搞夏令營,有亞洲人、南美洲人、歐洲人報名參加,希望成為球隊一分子;無論膚色、性別,我哋係人人平等。見工嗰陣,我發現好多人忽略咗笑容;哈林球員係表演者,講求投入,令觀眾開心,單靠球技、體能係唔得㗎!但有樣嘢可以肯定,就係球員人工唔錯!」
由1927年起成立至今,哈林都係美國文化象徵,曾經喺冷戰時期到過莫斯科表演,今年2月再同政治再扯上關係,隊員Moose同前NBA公牛球星洛文到訪北韓,Moose仲喺北韓領袖金正恩面前玩入樽,「我同金正恩冇乜傾偈,我覺得平壤比想像中好,最估唔到係好多人識得打籃球。呢次去北韓引起好大爭議,如果平壤再邀請我哋,我都會去,只係想令啲北韓平民開心吓。」
哈林一年平均有成200場演出,球員可以體驗各地文化,亦成日鬧出笑話;好似今次濠江之旅,另一隊員Hacksaw話:「今朝食早餐,我哋將煙肉、蛋同烤鴨撈埋一齊食,味道幾得意。」一講到最難忘嘅一場騷,有個兩歲大囝囝嘅Ant就認真起嚟,佢回想起幾年前話,「嗰場表演畀患咗重病和癌症嘅小朋友睇,見到佢哋開心,但自己心裏面好唔舒服,因為佢哋好快就離開人世,完場後特別帶佢哋到後台參觀。」哈林表現今晚8點開騷,9,000張門票尚量少餘,門票80至668蚊,香港快達票同金光綜藝館即場有售。
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange