轉會窗未正式重開，修咸頓又急不及待甘願被拆骨，以往主力走剩無幾；又睇吓領隊朗奴高文今季嘅買賣眼光，會唔會再一次令外界跌盡眼鏡。
呢個禮拜，當英格蘭新貴右閘尼達利基尼，同法國防中舒尼達連（圖），會分別正式過檔利物浦同曼聯後，修咸頓對比前季開鑼戰作客1:0贏西布朗嘅正選陣容，走剩中堅荷西方迪、防中雲耶馬、土炮新星嘅禾特普斯同前鋒積洛迪古斯四將，喺嚟緊八月八日開鑼嘅英超，北伐紐卡素時可列正選。只花兩年，兩位歐洲領隊、前任普捷天奴，同現任朗奴高文已幾乎將修咸頓改頭換面，英超走得真快。
跑慣江湖嘅朗奴高文，上季跌盡球評家眼鏡，以為係嚟幫修咸頓呢隻沉船補窿護級；結果球會賣走總值逾一億鎊嘅主力，畀番7,000萬鎊呢位荷蘭領隊擴軍，亦能長期喺前列打滾，最後攞埋個歐霸盃參賽席位。高文教波成績唔標青，對上一個重要錦標已去到2008年幫華倫西亞，攞西班牙盃冠軍；修咸頓上季個隊型亦唔算好清晰，但係三位新前鋒都買得幾好，尤其沙迪奧文尼同杜辛泰迪治，仲有進步空間，不過今夏若然再賣走兩位中後場主將，影響會好大。
作用似法國同胞、阿仙奴高基連嘅防中舒尼達連，賣到2,400萬鎊，高文值得放手畀對頭人雲高爾。睇番由英甲已踢修咸頓嘅舒尼達連，上季場均攔截3.7次、截擊2.6次、解圍1.7次，入球四個；呢位近六呎高、少有嘅當打法國白人防守中場，連同球會另一中場主將雲耶馬，合共只有七個聯賽入球，證球隊上季守強攻弱，得54球失33球嘅行軍模式。舒尼達連去到曼聯，可以代替老退中嘅卡域克；又可以令雲帥安心畀爆炸頭費蘭尼推前一格，適當時打後上中鋒，曼聯呢單交易，唔比購入荷蘭新星迪比遜色。

賣基尼予紅軍影響大

修咸頓賺取2,400萬鎊，剩番踢法勇悍、帶點鹵莽，上季攞咗10張黃牌嘅雲耶馬，唔易獨當中路屏障，睇嚟高文稍後會入貨替補；右閘尼達利基尼以1,200多萬鎊投紅軍，影響更大。呢位係現時全英最強土炮右閘，身形紮實，助攻力極強；用番400多萬鎊，喺士砵亭搵個葡國年輕人薛迪列卡度代替，呢條「縮數」，又睇吓呢位荷蘭一代重炮過唔過到骨。
大半年前，修咸頓斥資4,000萬鎊，俗稱「黑盒」嘅新訓練基地正式啟用，被視為培訓出下一位加里夫巴利、禾確特、阿歷士張伯倫同勞基梳爾嘅重要搖籃；但上季所見，新人土炮有中場夏里遜列特及中堅馬特泰基特，出場幾次，表現未見搶鏡，恐怕未接得上班。
相反，另一來季升班嘅南軍般尼茅夫，剛斥資800萬鎊購入六呎五吋高的英格蘭年輕中堅泰朗明斯，野心唔細，來季修咸頓單係想獨霸南部，已不容易。

波神
電郵：mailto:[email protected]