內地開放自由行後，除咗帶動零售市道外，酒店業亦非常旺場。雖然近年有唔少新酒店開業，但老品牌依然屹立不倒，講到歷史悠久嘅，就不得不提灣仔六國酒店，因為佢係繼半島酒店後，全香港第二間歷史最悠久嘅酒店，噚日仲舉行咗80歲生日會㖭！

當年一間房收兩蚊

生日會上，一首首三、四十年代經典名曲不停播放，非常有懷舊feel。六國酒店第三代傳人、陸海通主席陳伯奇喺大會發言時，不忘多謝客人支持，強調「會提供最好服務招待客人」。六國酒店曾經係港島區最高嘅建築物，可見當年有幾巴閉，就連剛剛做咗亞洲第二富豪、嘉華國際（173）主席呂志和噚日都有送花牌致賀，實在畀面。

講番當年呢家五星級酒店開業時，六國酒店總經理李國儀話，「2蚊已經有間房，靚套房都係10蚊左右！」相對於𠵱家六國酒店最平一間房收成2,300蚊，睇嚟似乎好平，但實際上喺當時嚟講係超貴，「當時人工每個月都係2、3蚊！」佢仲話，酒店𠵱家八、九成都係舊客，最長情嗰批住咗成20幾年。
陸海通創辦人陳任國及陳符祥喺1931年，用咗廿多萬購入六國酒店現址，酒店喺1933年10月6日正式開幕。1937年發生「盧溝橋事變」，酒店就開始嚟咗一批新客——內地北方商家避難入住。1941年第二次大戰香港淪陷，六國酒店俾日軍徵用為日本高級官員俱樂部，改名為「千歲館」。戰後換嚟一班英美水兵，喺酒店內跟吧女暢飲共舞。結果吸引到《蘇絲黃的世界》作者Richard Mason，於五十年代初入住六國酒店四個月，更寫成呢個蕩氣迴腸嘅愛情故事。

李華華
mailto:[email protected]

足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24