【隻腳夠硬會着數啲】注意!第三場起改場地掛牌…
今晚咩環境場地掛牌
今晚(7日)谷草賽事用A跑道,度地儀指數2.70,場地掛牌為好地(第三場起改為好地至快地)。如天氣情況許可下,將按計劃在第4場後進行壓地。
距上次谷戰已兩星期,究竟利放定利追呢?睇番4月12日谷草A欄賽事,亦係相距之前一次谷戰兩星期,當晚掛牌好地及度地儀指數2.72,結果當晚大利前領馬,分別有「天狼星」、「和諧小子」、「全勝姿態」、「叫關健康」及「勝得威」一放到底勝出,當中三駒排四檔或以內,故此內檔放頭馬可優先留意。
今戰列陣馬中,第六場「和諧小子」轉跑谷草後連續兩仗均在谷草A欄一放到底贏馬,勝後再等番同一移欄才上陣,強配莫雷拉擺明想添食。
另外,第四場「全勝姿態」兩次角逐谷草A欄一哩非冠即亞,憑較佳場地性能又可建功。