憑《領悟》一曲聲名大躁嘅台灣女歌手辛曉琪，將於本月29日首次假台北小巨蛋舉行個唱，近日密鑼緊鼓綵排嘅佢，今日安排傳媒探班，同門師兄周華健帶住應節嘅月餅同柚子去探班，預祝佢個唱「又圓又滿」，令辛曉琪大感驚喜，仲發出高八度嘅尖叫嚟歡迎周華健到訪。周華健又即場發揮幽默本色，捧住兩個柚喺胸前，笑言似賣整容廣告。

其實辛曉琪喺周華健驚喜現身之前，提到自己正喺度練習《倆倆相忘》一曲，當年係經典戲劇《倚天屠龍記》嘅插曲，後來因為戲太紅而晉升成片尾曲，辛曉琪都笑言自己似獲「升呢」做貴妃娘娘，甚至皇后，令匿埋未現身嘅周華健要忍住笑，所以佢一出現時，就自稱係「路過的『內務大臣』（太監），來看皇后啦！」o氹得辛曉琪勁開心。

雖然周華健同辛曉琪演出經驗豐富，但原來有次喺「滾石三十」演唱會中，佢哋獲安排合唱《當愛已成往事》，周華健因為心情緊張而全程黑面，好彩上到台就回復狀態。而周華健亦自爆有次挑戰唱《領悟》，原先堅持唔降key，一度被樂手笑佢「不自量力」，最後周華健要低頭降key演出，辛曉琪坦言首歌音域太高，男仔唱一定要降key。

而辛曉琪話擔心喺台上提及已故嘅雙親時會喊，但佢呢排一直同自己講，一定唔可以喺台上喊，做好心理準備先上台。

精選娛聞，喺晒《娛果》
http://fb.com/appledailyent