馬浚偉、周柏豪同顏卓靈（Cherry）等，今日喺旺角出席「太陽計劃」同行抗毒活動。

最近馬仔主演嘅《宮心計2深宮計》熱播，馬仔笑言唔少人都搵佢劇透，佢話：「最近收到朋友嘅WhatsApp都係問我兩個問題，一係訂舞台劇飛，二就係劇透，我都會回個手勢畀佢，就係no，因為透露咗就唔好玩㗎嘞。」馬仔話仲有11集就結局，佢話一定有驚喜，佢話：「咁耐冇返無綫拍劇，今次喺香港同內地都咁大迴響，好感恩好開心。」

因為公司官司問題而冇得宣傳《宮》劇嘅周秀娜，之前喺活動上話掛住馬仔，馬仔就話：「對於佢哋啲合約問題我唔理咁多，我個人非常欣賞娜姐，佢好專業。我會邀請佢嚟睇我舞台劇。」提到收視好會唔會再找數？馬仔就話內地點擊30億就曬定欣同自己嘅床照，佢笑話：「過30億咁點呢？叫麥玲玲攞張裸照出嚟，啲人key玲玲姐個頭喺娜姐個身，話佢真係好似唐代美女，好搞笑，遲啲搵玲玲姐拍套後傳，叫《唐玄宗與楊貴妃》。」

另外，Cherry日前考獲車牌，今日仲好興奮，佢話已經開始睇車，自己鍾情白色，記者笑佢對白字情有獨鍾，問佢會唔會叫男友送車？Cherry笑話：「唔使，佢自己買就得。我第一個應該車教車師傅，因為出街前要補吓鐘。」而男友白只都戥佢開心，Cherry又自讚手車好辣。

精選娛聞，喺晒《娛果》
http://fb.com/appledailyent
攝影：仇志德