營業總監M打過幾份工，換湯不換藥，都係生成一條孭數命，季季都要俾大老闆「卒數」，頂得順就做落去，頂唔順就轉工。舊年沙士期間見勢色唔對（一定交唔足營業額也），詐病，自己炒自己，○三年九月份，唞夠之後，再出嚟搵工，因為經濟好轉，立即搵到，新老闆係美國長春藤名校畢業生，讀埋MBA，啱啱四十出頭，接管咗好多由老竇交落嚟嘅業務。
呢啲老細集中美精華，有中國人嘅一言堂，我大晒嘅作風，亦有美國人嗰種睇數字做人嘅態度，quota不斷增加，唔容忍每季營銷額下跌。總監M食住經濟上升浪，叫做交到差，但係太子爺話：「第一季做得好好，第二季要增長5%。」總監M為之叫苦，同太子爺駁咗三句嘴，太子爺立即講：「你唔好挑戰我，咁唔鍾意，唔好喺度做。」總監M惟有收聲，照啃。

總監M呢日打開報紙，見到上海姑爺靚仔羅康瑞鬧民主派：「香港有乜資格挑戰中央……咁唔鍾意（中央做法），唔好喺度住。」當堂撞晒火，將張報紙大力拍落寫字枱上，轟一聲咖啡濺出杯外，嚇到秘書立即走埋嚟問：「M生，發生乜嘢事？」
總監M問秘書：「登記咗做選民未？」秘書話：「冇喎，做選民又有乜用，都係北京大老爺話晒事㗎啦！」總監M話：「呢次有用呀，九月一於投票畀民主派！羅康瑞即係我哋太子爺一類，唔做選民，唔去投票畀民主派，我哋點可以反擊太子幫喎，我哋唔夠佢哋錢多，又唔夠佢哋口大，更冇資格入中南海，一於用選票玩番佢哋！」