【贏馬被貶】承認條氣有啲唔服！猛人輝向「人生」污點報仇
蘋果日報 2019/12/11 09:15
蘇兆輝夢幻人生贏馬被貶
蘇兆輝今個冬天在港度過
賽馬點都會涉及運氣，有啲馬主當旺成日入凱旋門，但亦有一啲賽駒本身有實力，但就偏偏同頭馬無緣，今晚（11日）谷中第八場三班1000米文廄「夢幻人生」就係欠運一族。
最慘就係上季季中曾經喺田草1000米以首馬過終點，但因為最後200米斜跑令「帆哥兒」嚴重受阻，結果由冠軍貶落第四，成咗鋪詐糊，仲連位置派數都冇。
「夢幻人生」之後跑過八場，拎過三個亞軍，包括前仗輸畀冤家「帆哥兒」，後者喺該場初嚐勝果，而「夢幻人生」仍未打破悶局，係現役之中數一數二嘅失運馬。
不過，「夢幻人生」今場有兩大變數，可能會轉運。
馬兒首度角逐谷草，C跑道直路較短，可能會有利呢類前置型賽駒，而且被貶一役嘅騎師蘇兆輝終於再次騎番，「猛人輝」上季嚟香港客串豪取44場頭馬，但佢直言「夢幻人生」被貶令上次香港之旅番下一個小小嘅污點。
相隔大半年，「猛人輝」仍然有啲唔服氣，但既然被貶已成事實，唯有繼續嘗試，寄望終有出頭天，「夢幻人生」今場專攻泥地，但早喺今年一月曾經喺騎者胯下試過1200米谷閘，快放之下得亞軍，表現唔錯。
「猛人輝」一整年喺全球各地唔同地方上陣，但佢喺賽前睇片做功課，亦勾起番呢課閘嘅記憶，佢讚「夢幻人生」應付急彎冇問題，今次轉場一試，當然想贏馬，可以同馬主正式影番張拉頭馬相。