韓國娛樂圈今日又爆出戀情，男女主角分別係日先喺綜藝節目《一日三餐》話自己同前女友分手唔夠一年嘅男星孫浩俊，同埋同男星宋再臨喺綜藝節目《我們結婚了》入面扮假想夫婦嘅女星金素恩。

今日，有韓國傳媒就公開佢兩個早前約會嘅相，相中兩人都齊齊著晒大褸，戴晒帽咁，似乎係怕畀人認出。

據知，佢兩個喺上月尾開始就成日見面，上個月金素恩個媽媽因為唔舒服喺首爾江南區一間醫院接受治療嘅時候，孫浩俊同金素恩傾完電話之後，都即刻揸車去探伯母，探完病之後，佢兩個仲喺孫浩俊架車度傾計，關係好親密下。

再去到前晚，孫浩俊又搵代理司機揸住自己架白色寶馬去到金素恩屋企樓下，而金素恩亦面帶笑容咁上車。之後佢哋就去咗清潭洞一間法國餐廳，食咗成三個鐘頭飯。

消息傳出之後，金素恩方面就例排唔認，仲話佢哋見面當時其實都有經理人喺身邊，而孫浩俊方面就話佢而家拍緊戲，所以冇確認到。

另外，有粉絲睇到之後都反應好大話金素恩同宋再臨喺《我們結婚了》入面扮老公老婆扮得太逼真，估唔到金素恩私底下會同孫浩俊拍拖。