小雪於二○○四年下嫁永安旅遊前太子爺陳迅元，後來因陳迅元偷食巨乳女星蔡慧敏而離婚。事隔兩年，小雪帶女兒Ronni再嫁陳姓澳洲籍華人，並於翌年誕下幼子Rocco，但原來這段婚姻有名無實，兩人結婚六年一直分居，獨力照顧一對子女的小雪，去年決定揮慧劍與第二任丈夫離婚，以為坎坷過後無艇撘，但緣份將她帶到現任韓籍老公身邊，展開第三段婚姻。

小雪昨日在facebook公佈喜訊，自爆上月十四日情人節與韓國男友RobinCheung已註冊結婚，明年則會在首爾補辦婚宴。小雪上載多張註冊時的照片，穿上白色背心紗裙的她，由一對同母異父的子女陪住出嫁，冧爆的小雪不時與老公深情對望，而且錫完又錫，她留言：「緣份真是奇妙，當我在最孤單對婚姻已失去希望的時候上天讓我們相識，我們一同了解對方一同經歷很多事情。」

本報昨日致電小雪，恭喜她覓得好歸屬，她亦感觸說：「真係好開心，註冊當日都忍唔住喊，佢係一個好好嘅男人，為咗我放棄韓國工作嚟澳洲生活，又好努力工作，最重要係佢好愛錫我一對仔女。」小雪笑說：「仔女都好鍾意佢，囝囝仲搞笑，成日叫我結啦結啦，結咗我可以叫佢爸爸喇！」

曾經歷兩次婚姻失敗，再婚有否恐懼？小雪承認：「坦白講，失敗咗兩次係有啲驚，但佢不斷付出，我睇到佢好真心，佢父母對我都好好，唔介意我結過婚，接受我嘅過去。」會否再生BB？她說：「暫時冇計劃，佢見到我照顧兩個小朋友好辛苦，而且佢想等小朋友大啲，我哋可以多啲二人世界。」她又自爆註冊時的蝦碌事：「註冊要讀佢個韓文名，我讀咗好多次都讀唔掂，大家都忍唔住笑。」

另外，前B2成員譚嘉荃昨日出席公開活動時恭祝小雪：「好替佢開心，佢去澳洲前有同佢合唱過，未見過佢韓藉丈夫，希望有機會可以親自恭喜佢啦！」而小雪昔日拍檔漢洋，接受電話訪問時說：「同佢仲有喺fb聯絡，祝佢白頭到老永結同心，我知呢個男仔好好，不過冇諗到咁快又結婚，證明佢敢愛敢做，唔會一朝被蛇咬。」