早排有傳六叔病重,出院又入院再出院,到近排現身捐一億元賑災,噚日六叔就由六嬸方逸華扶住出席主持股東大會。雖則由九龍香格里拉門口落車去到一樓股東會現場,六叔行咗超過10分鐘,但眼仔睩睩嘅佢依舊精靈,面對記者即刻使出「我聽你唔到」絕招。至於望落至多60歲嘅六嬸,舊年爆響口話六叔諗緊退休之後,今年忽然玩封耳同封嘴,一粒字都冇講過,似乎呢一刻真係無聲勝有聲。
董事局成員個個跟大隊封嘴,反而最出位嘅係廣管局前主席、現任電視廣播副行政主席梁乃鵬。有個小股東想問問題,佢最初叫人一陣先問,但到後尾又捩橫折曲反寸小股東,質問做乜頭先唔問,不過見群情洶湧最後梁乃鵬都坐低應酬吓。