唔經唔覺，今日原來係巴西前鋒侯克加盟中超上海上港一周年，但呢位「變形俠醫」睇嚟仲未適應中超賽會嘅執法尺度喎。話說隊友奧斯卡杜斯山度士喺早兩周聯賽對廣州富力期間被指兩度用波蓄意省向對手，佢其後着上一件「Nothing to Do, Nothing to Say」嘅T裇被視為無聲抗議，最終被重罰停賽8場；有見及此，侯克同武磊等隊友連同上港球迷，喺上周聯賽對河南建業時齊齊身穿同款T裇聲援，點知惹來中國足協反彈，格殺勿論！

中國足協周五公佈罰則，其中武磊同侯克被指「在賽後致謝過程中以不適當的方式影響到聯賽環境，造成不良的影響」，結果雙雙被罰停賽兩場同罰款5萬元人民幣；另外，教練波亞斯亦因為喺ig上載奧斯卡慶祝相片，並以數據「355場；踢5年英超；47頂巴西喼帽；70入球。0張紅牌！！！停賽8場」加個倒豎手指公，結果被罰禁止督師兩場同罰款1.6萬元人民幣，球會亦被罰10萬元人民幣，未來兩場對手江蘇蘇寧同長春亞泰開心到暈。言論自由是零，足協果然緊跟國情。