嚟緊星期三（22日）谷中三班1200米第一組賽事，高伯新馬房「年年旺」抵港後場場接近，上仗用郭能更後上如飛得亞軍，走勢有餘未盡，至於同場「上海大師」（呂健威馬房）近七仗最叻跑第八名，表現可謂欠佳。

如果你係郭能，你會希望可以繼續騎「年年旺」，抑或改替「上海大師」效力呢？相信九成九嘅人，答案都係「年年旺」啦！

不過在現實中，郭能今仗將為「上海大師」操刀，但大家唔好誤會係佢放棄「年年旺」，相反係郭能遭一哥潘頓踢走，被搶去了「年年旺」的帥權，認真無奈。

現今馬壇一眾二、三線騎師，真係唔夠潘頓玩。上周六（18日）賽事，潘頓踢走貝力斯索騎勝出「閃耀榮光」，亦有「日日精彩」是潘頓開口撬馬，從利敬國手上搶來接手並贏馬，再咁落去，潘頓隨時變所有騎師公敵。

講番高伯新馬房「年年旺」，馬主是信和地產老闆黃志祥。此駒上仗在同程谷草1200米，僅以短馬頭位之微影相不敵「騰龍駒」做阿二，純粹欠運而已。

四歲愛爾蘭自購馬「年年旺」在港未開齋，高伯新難免心急，潘頓難得搭上超級富豪馬主，當然渴望領功，所以「年年旺」必定拼盡求勝。

---------------------------
【六四30】守住歷史 拒絕遺忘
https://hk.adai.ly/zdzKtt2RiW