今個禮拜算係06年第一季嘅最後一周，如無意外亦應該係05年11月開始嘅升浪嘅尾聲嘞。利世民自從聯儲局新官上場第一日就呼籲大家扣好安全帶，享受吓過山車嘅滋味，𠵱家過山車已經升咗成千三點，夠High未？
今個禮拜伯南克第一次主持聯儲局公開市場委員會，市場已經預期加息0.25厘，冇乜理由會唔加。之不過如果伯南克加得多過0.25厘，睇怕個市場都唔識反應；又如果佢直頭唔加息，咁就真係大禍臨頭矣！
𠵱家美國最大嘅經濟炸彈叫做房地產。伯南克最頭痛嘅地方，係唔可以好似隔籬孫兄咁亂篤，一個唔覺意篤爆美國房地產泡沫，美國未來幾年就必然有如山洪暴發。情況可以有幾嚴重？當年香港負資產有幾慘我哋心裏有數，但係都未有銀行要執笠。𠵱家美國只要有5%嘅業主斷供，就已經可以令兩大房產按揭公司破產，到時美國政府只得一招，就係用鈔票氾濫市場。不過今次要用成萬億，真係見到百年一遇嘅資金潮。