效力紐卡素嘅南韓中場奇誠庸近日接受英國傳媒訪問嗰陣就大談佢2016年為國家服兵役時嘅經歷，佢仲話只要國家需要佢嘅話，佢非常樂意上陣殺敵咁話。

南韓早排就被爆出有球員同運動員為咗逃避兵役，竟然偽造虛假出勤紀錄同病歷，不過奇誠庸接受英國每日郵報訪問嗰陣就真係Man到爆，話自己好願意為國家上陣：「我已經準備好保護我嘅國家同家人，假如國家有一日要打仗嘅話，我會同領隊賓尼迪斯講我要即刻返去南韓服役。」

呢位29歲中場又憶述當年服兵役時嘅情況：「當時我每朝都要六點半起身，同其他人一齊喺操場唱國歌，然後學習射擊同掟手榴彈，仲要孭住支步槍行20公里。服役嘅時候好多人都認得我，但係唔會有人要搵我簽名，因為大家都明白到自己係服緊兵役，所以我都非常尊敬我嘅同袍。」

雖然奇誠庸喺服役期間練得一身好武功，不過佢都希望永遠都唔需要用得著呢啲技能：「我希望南北韓有一日可以和平統一，我嘅爺爺喺50年代韓戰之後由北韓逃走到南韓生活，所以我嘅家族仲有好多人留咗喺北韓，雖然我同佢哋互不相識，但係我都為佢哋嘅苦況感到傷感。」
--------------------
新球季，新陣容！利物浦 FC 18-19季球星進駐《BFB》！立即帶領紅軍，踏上登頂之路！ http://bit.ly/2oQObi1
--------------------
《體蘋果》陪你睇波講波
https://www.fb.com/appledailysports