「物離鄉貴，人離鄉賤」，估唔到都可以應用喺漢堡包身上。
以前在加拿大讀書時，除非趕時間趕到漏肺，否則唔會幫襯食連鎖快餐店嘅漢堡包，因為雖然好似幾好味，其實真係冇乜好味。
最近逛金鐘西武，發現底層嘅FoodFair竟然開了一檔來自加拿大嘅「WhiteSpot」漢堡包專門檔。「WhiteSpot」在溫哥華是老字號，分店開遍全城，但當時實在冇太大興趣幫襯，除了某些時間為等停雪呆坐WhiteSpot飲無底咖啡殺時間之外。
他鄉遇故知，點都撐吓老朋友，約五十元一個「蘑菇漢堡」，比起「老麥」當然揦脷，但比起「DanRyan's」或其他大酒店的coffeeshop，五十元尚算合理。

「WhiteSpot」離開了本土反而勇猛精進，漢堡牛肉夠大夠厚、燒得夠香、夠juicy，蘑菇份量保持北美洲size，飽滿的一堆。最精采的是那個麵包，據資料顯示是新鮮出爐，即叫即烘，大大的一個，入口鬆軟，不似普遍的千篇一律工廠製了無生氣的死麵包，那種過實的包咬進口中會出現「搶水」情形，越嚼個口越乾，像在吃風乾食物。
如果你是漢堡迷，你會喜歡「WhiteSpot」的漢堡，一個美麗的漢堡能帶給你一個愉快的下午。曾擔心香港人對漢堡有點冷感，怕「WhiteSpot」生意撐不住，午市光顧，見長長的一條人龍在排隊，才放下心來，好東西還是有人會欣賞。