當年今日
關於我們

  北大美女主持教展 - 李八方

蘋果日報 2002/11/30 00:00


十六大之後,四位中央政治局常委──胡錦濤、吳邦國、黃菊、吳官正,以及朱總,都係清華大學畢業生。噚日清華嘅競爭對手北京大學,來港喺灣仔中環廣場搞咗個一連三日嘅「北京大學教育展」,展出北大嘅科研成果同百年威水史。點知記者會上,有人問咗個頂心頂肺嘅問題:比起清華高官如雲,北大出產嘅高官寥寥可數,有冇感到不是味道?
北大黨委書記閔維方不慌不忙,大數北大有幾多人才、幾多重點研究項目,又保證二○一五年會躋身世界一流大學,最後更大方祝賀「兄弟院校」嘅成就;呢位放過洋嘅史丹福博士,面對傳媒果然有一手。值得一讚嘅係大會搵咗一位美女做主持,呢位就讀北大國際關係四年級、來自哈爾濱嘅耿姝,正在中央台第四台兼職做節目。
(圖)耿姝(中)可算係北大之花,連教授、博士都爭住同佢合照。


傳真︰2623-9278
電郵︰[email protected]