當年今日
關於我們

【李八方online】趕住去上海?總領袖林鄭出席童軍會操續棄制服

蘋果日報 2018/11/04 18:07

李八方ONLINE童軍大會操林鄭月娥

前特首梁振英除咗挑釁性十足嘅言論令人難以忘記之外,佢出席活動貼題嘅穿着都為人留下好深印象,就好似當年佢着童軍服出席年度童軍大會操,今年又着華服出席華服節咁,反觀特首林鄭月娥就少啲新意,去到邊都多數以旗袍示人,今日佢再度以童軍總領袖身份出席年度童軍大會操,亦都係便服示人咋。
雖然林鄭唔多好cosplay,但佢早前喺港珠澳大橋上,就以一身粉紅色旗袍而變成「萬綠叢中一點紅」,搶晒鏡,今日佢雖然只係以灰色長外套配黑西褲出席會操,但加咗條藍絲巾點綴,所以同着上綠色主色童軍服嘅高等法院上訴法庭法官兼香港童軍總會會長潘兆初、香港童軍總會香港總監吳亞明,仲有一大班童軍合照時,同樣喺萬綠叢中別樹一格。
其實執行力十足嘅林鄭,着起童軍服上嚟應該都有返咁上下風範,不過會操後要出發去上海訪問嘅林鄭,可能因為咁唔想浪費時間換衫,所以都係免了。

立會補選新聞,《蘋果》一網睇晒
http://bit.ly/appledaily1125