黃翊今日喺商台接受訪問，佢透露現時計劃明年中開演唱會，不過一切交由公司去傾，佢話：「都要練歌，同埋操番大隻少少。」除咗飲食生意外，黃翊仲要錄音、練歌、出活動，所以少咗時間陪12歲嘅囝囝，由於囝囝讀國際學校，所以中文程度未如理想，囝囝點接手佢嘅飲食生意？佢話：「從來都冇叫個仔接手，因為我等佢自由發展，唔會迫佢學乜學物，佢話想學小提琴、跆拳道，但係學咗一陣就話唔學，我叫佢學嘢之前要諗清楚，o依家佢學色士風學咗一年，學得幾好。」

問黃翊會唔會邀請囝囝做個唱表演嘉賓？佢話：「之前喺家燕姐生日派對，我唱生日歌，阿仔負責吹色士風，原本阿仔唔制，我話會買隻game畀佢，佢先應承，上台之前，佢話心跳得好快，又腳震，好彩上到台，佢好淡定，完全冇甩過。」