【新增動新聞】
噚日先講完，家陣球星們喺社交網站越嚟越鍾意同球迷玩猜謎，好似基沙文同比利連都透過twitter剖白新球季去留，勢估唔到連周五未獲曼聯續約、即將成為自由身嘅瑞典前鋒伊巴謙莫域，都同球迷猜情尋！

伊巴周五喺instagram發佈一段長約半分鐘短片，唔使兩粒鐘已經有超過77萬點擊率，佢全程未有露面，只見佢喺床上初初用被鋪影住雙腳，配以輕快音樂好似啱啱起身咁，之後掀開被鋪，原來雙腳着住一對印有瑞典國旗嘅「一剔」波砵打晒拍子，片段咁就完咗啦……到底呢段短片有咩玄機？有網民認為着住瑞典波砵，係咪慶祝國家隊喺周五歐洲區世盃外反勝法國2:1咁簡單咋？亦有網民認為，佢咁樣打拍子即係證明自己日漸康復，仲有貨賣咁解！各位網絡神探有線索，不妨交流交流！