郭富城噚日喺旺角出席火鍋店開幕，剛榮升闊太嘅前港姐何艷娟亦有出席。城城一向熱愛食麻辣火鍋，店舖就送上「一世任食」貴賓卡畀佢，又送蛋糕預祝城城後日53歲生日。

城城話讀書時爸爸最鍾意同佢食辣，培養佢無辣不歡嘅嗜好，至於會唔會投資火鍋店？城城話：「以前有諗過，因為太忙暫時都係食，𠵱家有得任食就最開心，生意要落手落腳、親力親為，自己工作太忙，打消咗念頭。」自言是全家人中最食得辣嘅城城，自爆老婆Moka同屋企人都會就佢，又話Moka都可以食少少辣，問到傳有孕嘅Moka會唔會戒辣？城城話：「唔會，都會食。」

多時間陪家人

提到生日嘅慶祝方法，城城就話食火鍋，不過有時都會食中餐，仲要飲涼茶消熱。城城透露今年生日會喺香港過，近來要排演唱會、廣告宣傳同拍電影。對於生多個，城城話：「一直都話係天安排，順其自然。」另外，城城透露巡迴演唱會反應好好，廣州會加開一場，仲話做歌手會有更多時間陪家人同囡囡。
撰文：馮仁昭