動畫《壞蛋獎門人》（Despicable Me）成功捧紅一班「迷你兵」（Minions），今年嚟到第三集「犀利哥」竟然遇到比佢更加壞嘅孖生兄弟「巴閉哥」，仲打算引誘犀利哥重回壞蛋行列。喺電影宣傳片入面仲見到大班Minions竟然入咗監獄成為「監躉」，但佢哋非但冇唔開心，仲相當享受，除四出「蝦」其他囚犯外，仲收咗唔少囚犯做手下。

電影喺呢個月29號就會上映，喺播映前其中一位Minions成員就嚟咗香港搵手下，結果搵吓搵吓，搵到去咗籃球場，撞正三位本地甲一籃球員吳俊欣、何倚富同林羽，仲有年紀輕輕，今年只有10歲嘅學界籃球高手鄭珀麟四個打緊波，為咗收服幾位籃球高手，Minions唯有同佢哋落場，憑球技一決高下。

Minions落到場先發現自己唔夠高，而且手太短，俾班球員玩到「陀陀擰」，終於Minions使出一連串絕招，包括喺對手攞波時出手「唧」對方，又用上「鐵頭功」頂波走籃，結果梗係由Minions贏波，四位球員亦成功加入成為手下。

賽後四人同Minions一齊接受訪問，佢哋都話係《壞蛋掌門人》同Minions嘅忠實粉絲，雖然對方喺比賽時不停出茅招，但仍然甘心成為手下喎！

另外，喺青衣城城今個月25日到9月初，會展出一隻3米高Minions嘅3D公仔。

攝影：陳順禎
拍攝：馮嘉銘