第四場2400米香港瓶,係這天率先上演的一項國際賽,結果再次成為外隊提款機,當中愛爾蘭兵團岳伯仁訓練之「高地之舞」夥拍莫雅,以君臨天下姿態後上一攻而破,騎贏湛明諾,力挫上屆冠軍「富林特郡」。
「高地之舞」今夏在美國攻下2000米草地一級賽秘書長錦標,上仗在澳洲覺士盾跑入季席,今次則在香港瓶重響勝鼓,並造就愛爾蘭呢個歐洲國家,首度揚威香港瓶,而世界知名的冠軍級練馬師岳伯仁,首度在港贏馬,天下第一高手莫雅亦係第一次勝出香港瓶。
「高地之舞」係落飛次熱門,單Win有4.2倍,組合獨贏3揀1開A2派28.5元,組合獨贏勝出地區開C3派31.5元。今場幾乎畀三歲馬玩晒,三位主角「高地之舞」、「大利盈」同「明朝盛世」分別跑一、三、四名,連贏配腳即第二名由上屆冠軍5歲之「富林特郡」取得,呢匹法國代表上屆由紀仁安建功,一年後換上湛明諾卻衛冕失敗做二奶,今場開出客軍四重彩並派6,206元。
香港瓶歷史上只有兩匹香港馬贏過,包括98年「原居民」同前年「多名利」,今年出六駒打馬海戰,不過都係贏唔番呢項大賽,其中雷神座騎「喜蓮歡星」跑第五,已經係主隊名次最佳一駒。
另一方面,貝湯美今場騎主隊「活力歡騰」大敗尾二而回,賽後身體不適退下火線,餘下場次座騎悉數換人。