如題。52歲嘅呂方，真係艷福不絕。同嘟嘟鄭裕玲分手後，一直不愁寂寞，身邊女伴如車輪轉，包括強國有米粉絲王劍群（MayMay）、內地女子周小燕、長髮中女、短髮中女等等等等。但呂方嘅口味，似乎都係偏向操國語口音、而且比自己高嘅女仔。2012年初就被爆同一名講國語又高過佢嘅大胸新歡出雙入對；同年4月就識咗MayMay，再都係同年7月又被拍到同一個都係講國語嘅嫩女同遊PP，真係識嘆。

但其實呢，年過半百嘅呂方，雖然不停有女埋身，不過呂方已經「厭戰」，且有成家之意。

今年六月，本報喺灣仔影到呂方同一個高佢半個頭嘅中女、貌似其舊愛鄭裕玲嘅「靚版嘟嘟」撐枱腳(新聞連結: http://bit.ly/1lV7iDa )；至上月，兩人再被拍得到九龍城買餸，又牛扒又凍肉，似是準備燭光晚餐。當日兩人身穿黑色情侶裝，女方更加著平底鞋就番呂方嘅身高，但無奈都係高過男方三吋。

「靚版嘟嘟」身份一直成謎，只知佢係內地女子，皮膚白皙，外表較成熟。今日就有周刊報道指，原來靚版嘟嘟大有本頭，家住跑馬地比華利山，同呂方住緊嘅大坑台都好近。住得比華利山非富則貴，報道指原來靚版嘟嘟係內地富二代，更有傳老竇係做官嘅。咦，咁就唔止係富二代，直頭係官二代喇。

報道話，雖然靚版嘟嘟來頭不小，但難得嘅係沒有小姐脾氣，而且好識冧大男人呂方，小鳥依人人前俾足面亦毫無難度。得女方體貼若此，呂方，真係Legend。