周子揚喺2015年底離開無綫，或許大家唔記得佢演過乜嘢角色，但對佢同何傲兒、林建名嘅三角關係一定有印象。

日前周子揚係尖沙咀接受訪問，直言唔相信「爺孫戀」，佢話﹕「我覺得就應該冇，但佢哋嘅事，我唔方便回答。」周子揚同何傲兒分手後，曾爆傲兒家姐何傲芝向佢苛索每月20萬生活費，何氏姊妹揚言會追究，但周子揚聲稱自己講真話，冇有怕。事隔一年，周子揚話事情已經解決咗，所以唔想多講，佢話﹕「已經settle晒，唔再糾纏，希望大家可以專心工作，以前呢段咁慘痛經歷令大家成長，有遺憾同唔開心。(會唔會送上祝福？)絕對會，衷心祝福佢(傲兒)搵到一個適合同照顧佢嘅人，希望係娛樂圈發亮。不竟之前搞咗咁多新聞出嚟，大家都唔想，整整一年唔想再互相怪責對方，想帶多啲正能量畀大家。」

周子揚稱現在仍是單身，想搵一個好簡單嘅女仔，佢話﹕「o依家叫我拍拖，我都會好小心，以前唔會諗，鍾意就去。但o依家會睇吓適唔適合家庭，內地都唔介意，最羨慕任達華同琦琦，可以係演藝圈互相支持。」早前周子揚就返咗內地嘅相睇節目《中國式相親》，仲搵埋父母一齊，主持人介紹佢係「西貢地王之子」，家底咁厚，全場當然嘩聲四起！周子揚立即澄清自己唔係富二代，佢話﹕「可能當時傳媒想吹捧我嘅形象係好有錢去識女仔，話我阿爸係地王，但其實我父母係好踏實嘅生意人，我係一個對娛樂圈充滿理想、想幹一番事業嘅年青人，真係唔係咩有錢仔。(咁爸爸西貢有冇地？)都有，好坦白講，我Daddy媽咪都有起屋，鍾意買地，但唔係好top嘅富豪，屋企人好踏實，妹妹做金融，父母做地產，真係唔係嗰個級數，誇張咗。」

雖然周子揚強調唔係富家子，但以前係大台工作量唔多，出入都係揸跑車，佢話自己有好努力賺錢。當大台唔重用佢嘅時候，周子揚更一口氣考晒金融、地產同保險牌，好上進，佢解釋﹕「有段時間係TVB冇劇開，都有受之前新聞影響，緋聞轟動一時。(有冇畀公司照肺？)都有，越收埋越照肺，公司覺得我形象唔太好，所以冇機會拍劇。」但周子揚自覺條件唔錯，可惜係大台4年苦無機會，佢話﹕「我都有『唉』過(高層)話我得o架，你畀機會我啦，求吓畀機會啲後生仔啦，但佢哋都係叫我練好啲戲、準備好自己先，我就覺得好行啫。」周子揚眼見好多前輩做咗十年、廿年都係得個等字，最後決心離開大台返大陸發展，一年間已經拍咗4部電影，仲有老闆打本畀佢開製作公司，令佢自信心番晒嚟，佢話﹕「有段時間諗過自己係咪唔識合呢行，劇唔多，剩係得邊新聞，不如做生意人。係呢一年攞番自信，覺得觀眾認同自己，o依家醒番！」

場地提供﹕The Air(The One)