人類總要犯同一樣嘅錯!繼早前建制派民建聯串錯「MerryChristmas」做「Marry」及「Christmax」，今次發展局facebook專頁貼圖祝大家「MarryChrismax」，居然二個字都串錯，真係「Merry」變成「Marry」，「Christmas」變成「Chrismax」，尾音變咗做「max」，原本以為係網上「老翻網頁」，點知試去政府網發現有相關連結去此facebook，原來係堅0架喎。唔知寫嗰個人係唔係跟「Tree根」學英文㗎呢？

網民忍唔住留言「你串了甚麼字？！你堂堂政府部門，同民建聯打龍通嗎」、「真係書到用時鍾樹根」、「究竟你真係串錯字，定係寸緊民建聯呢」，真係唔知係「真心膠」串錯，定係乘機抽民建聯水，明寸民建聯，等大家笑下咋!

再對一對番，早前民建聯上水清河選區區議員藍偉良個banner，一樣串錯MerryChristmas，變成「MarryChristmas」，俾人笑藍議員唔知係想話俾街坊知佢要「嫁畀聖誕」、定係「聖誕娶老婆」喇；同時，又有另一個民建聯北區區議員王潤強被發現banner串成「MerryChrismax」，衰到連個「t」字都冇埋。

藍議員嗰張，字嘅顏色係黃色；王議員嗰張，係七彩。發展局呢張，就係集兩家之大成，上面「Marry」就係黃色，下面「Chrismax」就係七彩。如果佢真係想寸屬於建制派嘅民建聯唔識字，咁做圖呢位仁兄/仁姐有potential做政府高官喎！

咁當然，另一個可能就係——佢真係串錯字囉!

查實呢，廣告改圖出事都唔係首次，對上一個最經典例子，就係今年三月世界自然基金會香港分會（WWFHK）於fb專頁上載一張陳奕迅乘搭港鐵嘅圖，好明顯係P圖，港鐵背景圖都係上網搵，阿臣個「褪地」仲係退剩白邊，馬虎到冇朋友，結果俾網民瘋狂改圖，肉酸到呢……